Duniya ki tareekh gawah hai ke dil jeetne ke liye na daulat ki zarurat parti hai, na taqat ki, na hasab-o-nasab ki bartri kaam aati hai aur na hi zahiri khubsurti dilon par raaj kar sakti hai. Insan ki asal khubsurti uske akhlaq mein posheeda hai. Yehi woh khoobi hai jo doosron ke dil mein jagah banati hai, izzat o maqam ata karti hai, aur talluqaat mein mohabbat o murawwat ko farogh deti hai.
Qur’an Majeed mein Nabi Kareem ﷺ ke akhlaq-e-hasana ko kuch is tarah bayan farmaya:
“Wa innaka la‘ala khuluqin ‘azim”
Tarjuma: Aur beshak aap azeem-ul-shaan akhlaq par faiz hain (Surah al-Qalam).
Yehi woh akhlaq the jinhon ne dushmanon ke dil narm kiye, sangdilon ko mom banaya, Arab ke jahil muashray ko tahzeeb yafta bana diya, aur yateemon ke sar par shafqat ka haath rakha.
Yehi baat Nabi Kareem ﷺ ne kuch is tarah bayan farmayi:
“Innama bu‘ithtu li-utammima makarimal akhlaq” (Muwatta Imam Malik)
Tarjuma: Main to sirf is liye bheja gaya hoon ke acche akhlaq ko mukammal kar doon.
Ye hadees-e-nabwi ﷺ akhlaq ki ahmiyat ko wazeh karti hai. Aap ﷺ ki ba‘that ka asal maqsad insano ko aala akhlaq – jaise sachai, sabr, amanat, adl, afw aur reham – ka paikar banana tha. Yehi deen-e-Islam ka markazi paigham hai jo muasharti behtari aur infiradi kirdar saazi ki buniyad hai. Yehi akhlaq kisi ghareeb ko moazzaz bana deta hai aur kisi maal-daar ko zaleel bhi kar sakta hai.
Aaj ka insan taraqqi ki buland tareen manazil tay kar chuka hai: jadeed technology, barq raftaar mawasilat, aur aalami satah par ilm ka phelaav – sab kuch mojood hai. Magar afsos, husn-e-akhlaq woh daulat hai jo naapayd hoti ja rahi hai. Log guftagu mein sakhti, lehje mein talakhi, aur rawaiye mein bartri le aaye hain. Natija ye ke rishte toot rahe hain, dil door ho rahe hain, aur dilon mein mohabbat ke bajaye khala’ij panap rahi hain.
Insan jab gusse mein aakar buland aawaz mein baat karta hai, tanz ke teer barasata hai, takabbur ka muzahira karta hai, ya apni zuban se zehar ugalta hai – to alfaaz nahi, teer baraste hain. Darasal woh khud apne khilaf nafrat ki fiza hamwar karta hai. Aisa na ho ke tumhari zuban tumhare dil se zyada sakht ho jaye. Kyunke zuban ka zakhm woh nasoor hota hai jo barson mandamil nahi hota.
Chhuri ka, teer ka, talwar ka to ghaav bhara,
Laga jo zakhm zubaan ka raha hamesha hara.
Husn-e-akhlaq mein woh kashish hai jo alfaaz ko moti bana deti hai aur khamoshi ko taseer bakhsh deti hai. Akhlaq ke bagair ilm, daulat, husn, hasab-o-nasab sab be-ma‘ni ho jaate hain.
Kabhi lehja kisi ke dil ko choo leta hai,
Kabhi ek narm sa jumla zindagi badal deta hai.
Jis ke lehje mein mithaas ho, woh bin kahe bhi dil mein utar jaata hai. Aur jis ki zuban tez ho, woh hazaar khoobiyon ke bawajood tanha reh jaata hai. Ye baat kahi nahi jaati balki mehsoos ki jaati hai ke asal insan woh hai jo doosron ko apni mojoodgi se sukoon de, aur apne akhlaq se apne na hone ka afsos dilwa jaye.
Aqalmand insan jaanta hai ke kisi par zor zabardasti se asar nahi dala ja sakta. Dilon par raaj karna ho to narm lehja, sabr, bardasht, aur aajzi ikhtiyar karni hogi. Izzat maangne se nahi, amal se hasil hoti hai.
