Insaan ki asal taqat uske baazuon ki quwat mein nahi,
balkeh uske irada ke khameer mein chhupi hoti hai.
Yahi irada hai jo insaan ko shikast ke mLabay mein bhi yaqeen ki kiran dikhata hai,
aur kamiyabi ki chotiyon par bhi use inkisaar (humility) sikhata hai.
Zindagi ke maidan mein qadam rakhne wale sab musafir nazar ek jaise aate hain,
magar unke iradon ka wazan alag hota hai.
Kamzor irade wale halaat ke bahaav mein beh jaate hain,
jabke mazboot irade wale woh hote hain jo khud dhaare ka rukh badal dete hain.
Woh waqt ke ghulam nahi hote, balki waqt ko apna taabi‘ bana lete hain.
Zindagi ka har faisla insaan ke baatin ki jhalak hota hai.
Jo log har hawa ke jhonke par apna rukh badal lete hain,
woh kabhi manzil nahi paate.
Unke qadmon ke neeche zameen nahi rehti,
kyonke woh duniya ki raye ke aseer hote hain.
Unki zaat ek aisa panchi ban jaati hai
jo har shor par udne lagta hai, magar kabhi aashiyana nahi banata.
Duniya ke dar se faisle badalne wale
hamesha pachtawaye ke saaye mein jeete hain.
Unke din maslahat ke bojh tale dab jaate hain
aur unki raaten “kaash” ke afsos se bojhal rehti hain.
Lekin kuch insaan aise bhi hote hain
jin ke andar ka chiraagh kabhi nahi bujh’ta.
Woh faisla karne se pehle rukte hain, sochte hain,
Allah se dua karte hain, istikhaara karte hain,
apne se behtar logon se mashwara lete hain.
Aur jab ek raah chun lete hain
toh phir us raah se hatne ka sawal hi nahi rehta.
Woh waqt ke toofanon mein bhi apni simt (direction) qayam rakhte hain.
Duniya unpar hasti hai,
thanz (taunt) ke teer barsati hai,
magar woh apni khamoshi se poori duniya ka shor badal dete hain.
Yahi woh log hain jo zamane ke dhaare ko mod dene ki himmat rakhte hain.
Faisla lena aasaan hai,
magar us par date rehna sab ke bas ki baat nahi.
Kamzor irade wale jaldi mayoos ho jaate hain,
woh halaat ko qasoorwar thehra kar peeche hat jaate hain.
Magar woh jo yaqeen ke musaafir hote hain,
woh jaante hain ke har aazmaish ke peeche rehmat ka darwaza chhupa hai.
Unki aankhon mein khwab hote hain,
magar khwabon se badh kar unke dilon mein hosla hota hai.
Woh gir kar sambhalne ka fun jaante hain,
woh waqt ki thokaron se nahi ghabraate,
kyonke unhe yaqeen hota hai
ke agar niyyat saaf ho, raasta durust ho,
aur mashwara mukhlis logon se kiya gaya ho,
to anjaam mein khair hi khair hai.
Duniya ki tareekh gawah hai
ke bade faisle hamesha mazboot dilon ne kiye.
Kabhi kisi mufakkir ne qalam utha kar zehno ki simt badal di,
kabhi kisi muslih ne ek sada buland kar ke qaumon ki rooh jaga di,
kabhi kisi rehnuma ne halaat ke samandar mein aisi lehrain paida ki
jo sadion ka rukh badal gayin.
Aise log duniya ke tamashai nahi hote,
balki tareekh ke mimaar (builders) hote hain.
Unke irade waqt se larte nahi,
balki waqt ko apne khwabon ki ta’beer banate hain.
Faisle ke peeche agar niyyat ka ikhlaas
aur yaqeen ki pukhtagi ho
to kamiyabi ka waqt khud aa kar darwaza khatkhatata hai.
Aise insaanon ki nigaahein duniya ki chmak par nahi,
balki sachchai ke noor par tikki hoti hain.
Woh amal karte hain, nateeje ki fikr nahi karte.
Woh jaante hain agar faisla Allah ki raza ke mutabiq hua
to duniya ki koi taqat unka rasta nahi rok sakti.
Jo insaan istikhaara ke baad, mashwara ke baad,
aur khuloos ke saath koi qadam uthata hai,
woh kabhi gumrah nahi hota.
Uske faisle waqti nahi, barkat wale hote hain.
Uske irade mein woh tawazun hota hai
jo rooh ko sukoon deta hai aur aql ko itminaan.
Woh nakaami ko shikast nahi samajhta,
balki ek sabak samajhta hai.
Woh jaanta hai ke Allah ke nazdeek der kabhi mehroomi nahi,
balki tiyaari ka doosra naam hai.
Zamane ke dhaare ko wohi log mod sakte hain
jin ke faisle khud unka yaqeen ban jaayein.
Jo log apni baat se peeche hat-te hain,
woh khud apni manzil se hat jaate hain.
Magar jo ek martaba faisla kar lein
aur Allah par bharosa rakh kar us par qayam rahein,
wohi log tareekh ke oraak (pages) mein
roshan harfon se likhe jaate hain.
Woh rukh-e-taqdeer par apne yaqeen ki lakeer kheench dete hain.
Zindagi mein asal jeet unki nahi hoti
jo sabse pehle pahunchte hain,
balki unki hoti hai jo aakhri dam tak jame rehte hain.
Irade ki pukhtagi woh quwwat hai
jo insaan ko halaat ka aseer nahi banne deti.
Duniya ke toofan jab thamm jaate hain
to yahi log baaqi reh jaate hain,
kyonke woh waqt ke nahi, yaqeen ke safar par nikle the.
Insaan agar apne faislon ko aql, imaan aur istikhaara ki roshni mein tay kare,
maahireen ki rehnumai se unmein tawazun paida kare,
aur phir Allah par tawakkul rakhte hue unpar dat jaaye,
to uske har qadam ke neeche kamiyabi ke phool bikhar jaate hain.
Aise log jab rukhsat bhi hote hain
to zamana unke azm ke chiraagh se raasta dhoondta hai.
Aakhirkar, duniya unhi ke qadmon ke nishanaat se
apni simt tay karti hai
jo apni simt badalne ke bajaye
zamane ki simt badal dete hain.
Wohi log asal mein zindagi ke haqeeqi faateh hote hain,
kyonke woh faisla karte hain, nibhaate hain,
aur apne yaqeen ki roshni se zamane ke dhaare ko mod dete hain.
Irade jin ke pukhta hon, nazar jin ki Khuda par ho,
Talaatumkhez maujon se woh ghabraya nahi karte.
(Jin ke irade mazboot hon aur jo Allah par bharosa rakhte hon,
woh tufaani maujon se bhi nahi ghabrate.)
